परवा अगदी सहज माझ्या चार डोळ्यांनी काही नाविन्यपूर्ण असे टिपले. माझ्या असंख्य मैत्रिणींपैकी एक जण मस्त लांब, सरळ, चमकते केस मिरवत होती. खूप म्हणजे खूपच छान दिसत होती ती, पाच एक वर्ष तरुण. वाखाणण्यासारखा बदल होता. मला खूप उत्साही वाटलं तिच्याकडे बघून. मग सहज माझ्या छोट्याश्या मेंदूला ताण दिल्यावर लक्षात आलं, कि हिचे केस तर दाट आणि कुरळे होते, साधारण / मध्यम लांबीचे. अर्थात ती पण पाच एक फूट उंचीची असल्यामुळे सध्याचे नवीन केस जरा जास्त लांब रुंद वाटत होते. म्हटलं हे नक्की काय आहे. तेव्हा समजलं कि हिने सरळ करून घेतलेत केस. कुरळे केस सरळ केले ताण देऊन, मशीन वापरून, उष्णतेमुळे विस्तारतात बरेचसे. अहाहा च. क्या बात है. कायापालट च होता तो.
अगदी तसेच. आपण देखील आपल्या विचारांना, कृतींना, शिकण्याला, आत्मसात करायला किंवा अजून काही अत्यावश्यक बाबींना हवा तेवढा ताण दिला तर? फक्त विचार करा मंडळी कुठे पोचू आपण सर्व, काय काय पादाक्रांत करता येईल सहज अगदी नवीनतम गोष्टी अनुसरुन. नाही का? करून बघायला काय हरकत आहे. किंबहुना आपण सातत्याने करत असतोच. पण कधीतरी, कोणाला तरी एक ठेहेराव येऊ शकतो, साहजिक आहे. तेव्हा एक छोटासा प्रयत्न तर बनता है बॉस. नाही पटलं, आवडलं तर काहीच हरकत नाही. तसेही केस सुद्धा जर तात्पुरते, एका वेळेपुरते सरळ करून घेतले तर एका धुण्यानंतर तर ते मूळ पदावर येतातच. त्यामुळे chill आणि तो आवश्यक ताण द्याच मंडळी.
कोणत्याही टिप्पण्या नाहीत:
टिप्पणी पोस्ट करा