२२८९: अपेक्षांचे ओझे

माझ्या आधीच्या पिढीपासून मी हे बघत मोठी झाले आहे आणि ते खरोखर सत्य आहे. जेव्हा एका मुलाचे आणि मुलीचे लग्न होते, तेव्हा मुलगी माहेरहून कितीही शिकून आली असली तरी, सासरी राहताना तिच्यापुढे वेगळी आव्हाने उभी ठाकतात.

आणि त्यात जर ती लवकर आई झाली, तसेच दोघेही नोकरी करत असल्याने एकाकी (Nuclear) कुटुंबात राहायला लागले, तर तिची जास्त तारांबळ होते, अगदी जणू सर्कस.

सर्व मुलांना त्यांची आई सुगरण, शिस्तीत आणि जगावेगळ्या उच्च पठडीतली वाटते, पण ती भावना मुले 'जाणती' झाल्यावर निर्माण होते. तोवर ती आई स्वतःही अनुभवाने समृद्ध झालेली असते. त्यामुळे मुलांना एक अशी दृढ भावना निर्माण होते की, आई म्हणजे उत्कृष्टच, सर्वार्थाने.

आणि मग याच उत्कृष्टतेवरून नवीन बायकोकडून मध्यमवर्गीयांमध्ये विशेषत: फार मोठ्या अपेक्षा वाढतात, आईसारखे होण्याच्या. इथेच नकळत तुलना सुरू होते.

पण ही तुलना पूर्णपणे चुकीची आहे, कारण वय, पिढी, शिक्षण आणि अनुभव यात मोठा फरक असतो. प्रत्येक मोठी होणारी आई मुळातच अनुभवाचे गाठोडे घेऊन आलेली नसते. तीदेखील त्या वेळी नवीनच आई झालेली असते.

त्यामुळे अनेक जाहिरातींमध्ये किंवा व्हिडिओंमध्ये दाखवतात तसे, जर ती चुकली, अनेकदा चाचपडली, धडपडली, तर यात गैर काय आहे? ती तशी आहे, कारण ती तिच्या पद्धतीने प्रयत्न करत आहे.

हे बघणाऱ्यांना जर चुकीचे वाटत असेल, तर कृपया तिला मदत करा. फक्त तोंडी शब्दफेक करणे उपयोगाचे नाही.

आणि जर मदत करायची नसेल, तर गप्प राहा. कारण, आई किंवा माणूस म्हणून कोणीच शंभर टक्के उत्कृष्ट असू शकत नाही. तुम्ही स्वतः बघा, तुम्ही शंभर टक्क्यांपेक्षा जास्त अचूक असाल, तरच सल्ला द्या, आणि तोही तेव्हाच, जेव्हा तिने मागितला असेल.

नाहीतर तिला आई म्हणून घडू द्या, चुका करू द्या. ती कोणतीच गोष्ट मुद्दाम करत नाहीये. कदाचित तेच प्रारब्ध (नियती) असणार त्या मुलांचे.

कदाचित त्या दोघांना, आई आणि मुलांना त्यातूनच शिकता येणार, ते तसेच घडणार असतील, तर कोणीच काहीच बदलू शकत नाही.

ती आई म्हणून उदयाला येते आहे, सोप्प नाही ते. तिच्यासाठी सगळंच नावीन्याने भरपूर आहे: नवीन घर, आईपण, नोकरी, जागा, माणसं, बाळांची वाढ, शारीरिक आणि मानसिक बदल, अंतर्बाह्य बदल... त्यात प्रेक्षकांच्या टोमण्यांची, सूचनांची भर नको. सूचना करण्याच्या पद्धती असतात, त्या अवलंबता आल्या तर बघा नाहीतर ढवळाढवळ नकोच.

त्यामुळे, सोडून द्या. कानाडोळा करायला शिका.