थोडक्यात समजलेला अवलिया...

एवढ्यातच, सहज गप्पा मधे एका अवलिया बद्दल माहिती मिळाली आणि का कुणास ठाऊक लिहावंसं वाटलं. माझी त्यांची ओळख नाही, भेट तर नाहीच नाही.

ते जेव्हा अगदी लहान होते तेव्हा त्यांना पोलिओ झाला होता म्हणे. पण थोड्याच दिवसात ते अगदी बरे झाले आणि त्या नंतर अनेक वर्ष गाडी सुरळीत चालू होती. व्यवस्थित शिक्षण झाले, एस बी आय मधे नोकरी मिळाली, लग्न मुलं सगळं जवळपास २०-२२ वर्ष चालू होत. आणि अचानक पोलिओ नी पुन्हा एकदा डोकं वर काढलं. त्यांना स्वेच्छा निवृत्ती घ्यावी लागली. आज २२ वर्ष ते घरात आहेत आणि वॉकर घेऊन घरात सगळं करतात. ते वाणिज्य शाखेतील विद्यार्थी इंजिनीयर नाहीत, तरी पण त्यांनी त्यांच्या वॉकरला त्यांच अक्षरश: घरच केलं आहे. प्रत्येक वस्तू साठी वेगळा कप्पा स्वतः तयार केला आहे, त्यात डायरी, पेन, पेन्सिल, खोड रबर, दूरदर्शन चा रिमोट, आणि इतर. सगळ्यात महत्वाचं म्हणजे एक मोठी काठी सारखी वस्तू देखील आहे. त्यांच्या वॉकर मधील कुठलीही वस्तू जर चुकून खाली पडली तर त्यांना अजिबात वाकता येत नसल्यामुळे त्यांनी एक चिमटा पण ठेवला आहे, लांब असा कि त्यात छोट्यातली छोटी वस्तू देखील उचलता येईल. कुठून येत असेल एवढी ऊर्जा? कमाल आहे. दिवसभर घरी कोणी नसतांना कोणावरहीअवलंबून नाहीत ते.

का कुणास ठाऊक पण माझा प्रार्थनेवर प्रचंड विश्वास आहे. म्हणून माझ्या सगळ्या मित्रांना विनंती आहे कि ह्या अवलियासाठी आपण रोज प्रार्थना करू यात, कि त्यांना अशीच ऊर्जा सतत मिळो. धन्यवाद.