माझ्या कपाटाचा अनोखा सुगंध...

 आमच्या वेळी अत्तरच जास्त प्रसिद्ध होते, इतके कि अत्तर मिळण्याची वेगळी गल्लीच होती नागपुरात (पूजेचं अत्तर वेगळं, हळदी कुंकुवासाठी च वेगळं, आणि स्वतः वापरायचं त्याहून वेगळं बर का), जेथे अर्थात धूप, उदबत्या देखील मिळत होत्या. त्याउपर डांबराच्या गोळ्या काय ते ठिकठिकाणी ठेवलेल्या असायच्या कपाटात, दिवाणात आणि इतरत्र.

"Cherry on Cake" म्हणजे सुगंधी साबणाचे पाकीट... नवीन आंघोळीचं साबण काढलं कि त्याच पाकीट कपाटात नवीन / बाहेर घालून जायच्या कपड्यात घुसवून ठेवायचं. बाकी सर्रास सेंट / परफ्यूम वापरला जात नसे. किंबहुना कपड्याच्या साबणात आजकाल जसा सुगंधाचा मारा केला जातो तेही नव्हतं कधी. पण तरीही ह्या साबणांच्या पाकिटामुळे भलतंच ताजतवान वाटायचं दिवसभर. आज नवीन साबण काढतांना सर्व आठवणींना उजाळा मिळाला. अहाहा. आज ह्या छोट्याश्या कृतीची जागा पाणीयुक्त डिओने किंवा उग्र सेंटने घेतली आहे. विविध रंगीबेरंगी डांबर गोळ्या, फरशी साठी सुगंध वेगळा, न्हाणी घरासाठी त्याहून निराळा, कारसाठी अजूनच तिसरा, खोलीसाठी भलताच, मिटिंगच्या खोलीत पण, आणि सर्वत्रच अनेकविध सुगंधी उत्पादने उपलब्ध आहेत बाजारात आजकाल आणि (साबणाच्या पाकिटाच्या) छोट्याश्या सुंगधाला आता थारा उरला नाही आहे, कारण कामांचे तास वाढले आहेत, प्रदूषण, धूळ, ई. मुळे नवनवीन उत्पादने बाजारात येत आहेत आणि लोक वापरात देखील आहेत.