खरेदी

आज च्या वर्तमान पत्रात दिमाखात एक फोटो छापून आला आहे. त्यात एक छोटी मुलगी दुकानाच्या काउंटर वर उभी केली आहे, कारण तिचे वडील तिला रेनकोट घालून बघत आहेत. देवा. मी तर अक्षरश: निशब्द झाले तो फोटो बघून.

ह्या भयानक काळात जरी दुकाने उघडण्यास परवानगी दिली असली तरी परिस्थती अजूनही निवळली नाही, बाहेर पडणं धोक्याचं आहेच. त्यात अश्या ३-४ वर्षाच्या मुलीला घेऊन... म्हणजे काय बोलायचं. सध्या सगळेच घरी आहेत, शाळा बंद आहेत आणि अश्या छोट्या मुलांच्या शाळा इतक्यात सुरु नाही होणार हे सगळ्यांनाच माहित आहे, मग का?

व्हाट्सअप वर व्हायरल झालेला निरोप आहे मेडिकल तज्ज्ञांकडून कि सद्यस्थिती प्रेस्क्रिप्शन काय तर "फेविकॉल लावून घरी चिटकून बसा, बाहेर अजिबात पडू नका, ज्यांना गरज नाही त्यांनी". आता हे रेनकोट घेणं काय गरजेचं आहे, ऑनलाईन घरबसल्या मागवता येतो ना, काहीही म्हणजे काहीही विचित्र करत बसायचं. राग येतोय मला.

अगदी आवश्यक वस्तू विकत घेण्यास देखील बाहेर जायची गरज नाही, सगळं घर बसल्या मिळतंय आता. प्लिज. कृपा करा. आणि सगळ्यात आश्चर्य म्हणजे सकाळ सारखा पेपर हे छापून आणतोय, हद्द आहे. पोलीस किती आणि काय काय बघणार हो, प्रत्येकाने त्यांची स्वतः ची काळजी घ्यायला नको. जबाबदारी आहे हि प्रत्येकाची. आशा करते कि सगळे म्हणजे सगळे जण आपआपली काळजी नीट घेतील, अगदी थोडे च दिवस, हे दिवस पण लवकरच निघून जातील.