इस्त्री आणि सुरकुत्या

माझ्या मते बहुतांशी सगळ्यांनाच कॉटन चे कपडे परिधान करायला फारच आवडतात, भावतात. ते सगळ्या ऋतूत एकतर घालता येतात आणि फारच सोईचे असतात, सांभाळायला पण फारच सोपे आणि मायाळू असे. मी काही वेगळी नाहीच, मला तर भारी प्रेम आहे ह्या कॉटन / सुती कपड्यांवर.

मधे काही जाहिराती बघण्यात आल्या आणि त्यात असं नमूद केलं होत कि त्या एका विशिष्ट कपड्यांना अजिबातच सुरकुत्या पडत नाहीत. मी ते कपडे वापरले नाहीत त्यामुळे मी त्यावर अधिकाराने भाष्य करू शकत नाही. असो.

पण सुती कपडे म्हटले कि सुरकुत्या आल्याचं. ते हाताने धुवा नाहीतर मशीन ने, कितीही काळजीपूर्वक वाळत घाला पण सुरकुत्या पडणारच. मग काय हरकत आहे, इस्त्री आहे कि. छान प्रेमाने इस्त्री केली कि झालं, सुरकुत्या गायब. आणि आपण तय्यार ते कडक इस्त्री केलेले कपडे घालून मिरवायला, किंवा काम करायला. प्रत्येक वेळी ते कपडे घातले कि बहुतेक काही वेळातच किंवा संध्याकाळ पर्यंत त्या सुरकुत्या, किंवा नवीन पद्धतीच्या सुरकुत्या हजर. आणि धुतल्यावर तर येणारच. पण असो, ते सुती कपड्यातले समाधान, सोय ई. जास्त महत्वाची, नाही का? आणि त्यावर तरणोपाय आहे ना, पुन्हा इस्त्री, बास, सोप्प आहे.

आपल्या दररोज च्या रोजनिशीत टप्प्या टप्प्यावर पण असंच असत काहीस नाही का?, अनेक प्रकारच्या सुरकुत्या पडतात कपड्याला, कधी सहज, तर कधी नीट बसलो नाही म्हणून, तर काही इस्त्री नीट तापली नाही, वळवळत छोटं मुलं मांडीवर घेतलं म्हणून  किंवा ते सुती कापड जुनं झालं म्हणून... त्याचा अर्थ आपण थांबत नाही, पाणी शिंपडून इस्त्री करतो, इस्त्रीचे सेटीन्ग्स बदलतो, इस्त्री जास्त तापवतो, किंवा थोड्यावेळ जास्त प्रेमाने इस्त्री करतो, काहीच नाही जमलं तर शेवटी धोब्याला देतो, त्याची मदत घेतो, त्याच्या शक्तिशाली इस्त्रीने मग छान सगळ्या सुरकुत्या निघून जातात.

"जीवन चलने का नाम, चलते रहो सुबह शाम..."

आपण ज्या विविध घडामोडीना सामोरे जातो सदोदित त्या पण एक प्रकारच्या सुरकुत्याचं हो, तेव्हा विविध उपाय शोधून काढायचे, (not literally) विविध इस्त्रा शोधून जपून ठेवायच्या, जवळपास चे पट्टाकिनी उपयोगी पडणारे धोबी बघून ठेवायचे आणि गाडी सुरु ठेवायची. त्या सुती कपड्यांना, सुरकुत्यांना, स्वतःला दोष द्यायचा नाहीच. हरकत नाही सुरकुत्या राहिल्या तर. माझे बाबा नेहेमी म्हणायचे "आपण करू ती फॅशन". त्या सुरकुत्या छान दिसत आहेत असे स्वतःला सांगितले / बजावले कि झालं. कोणास ठाऊक अनेक जण तुमचं बघून सुरकुत्या सहित कपडे परिधान करायला शिकतील, किंवा ते पण वाटच बघत असतील कि कोणी तरी अश्या गोष्टी सुरु कराव्यात म्हणून. फारच ओंगळ भोंगळ अवतार दिसणार नाही ह्याची काळजी आपण घेणारच आणि घेतातच सगळे कळत न-कळत. त्यामुळे बिनधास्त राहा.

सुरकुत्यांचा विजय असो.

चला तर मग, जास्तीत जास्त आपल्या देशाला, पर्यावरणाला सुताचे कपडे वापरून मदत करू या, हातभार लावू या. अजून काही जास्त जाणून घ्यायचं असेल तर निश्चितच वाचा www.ecotattva.com 

#cotton #cotton-cloths #press #iron #laundry #wrinkles-on-cloths #wrinkled-cloths #life #difficulties #friends #philosopher #guide #challenges-of-life