माझा एक मानलेला भाऊ आहे. अनेकदा त्याच्या आईकडे माझं जाणं झालं होत, अनेक वर्षांपूर्वी, विविध कार्यासाठी. तेव्हा त्यांच्या घरी खूप वेगळेपण जाणवलं. जसे कि कुठलीही उसळ हि शांतपणे चुलीवर ठेवून शिजवली जायची जसे कि छोले, राजमा, आणि इतर. दुसऱ्या चुलीवर दिवसभर / चूल थंड होई पर्यंत दूध उकळत किंवा गरम असायचं सतत. हे खूप छान आणि नवीन होत मला, अर्थात मी हे सगळं खूपच वर्षांपूर्वीच सांगते आहे.
मग ह्या माझ्या भावाचं लग्न झालं. त्याने त्याच घर उभं केलं, मुलं मोठी झाली आणि पुन्हा काही कारणास्तव माझं आता त्याच्या घरी जाणं झालं, आईच्या नाही. तेथे देखील एक गोष्ट बघून मी उडालेच, अक्षरश:. सर्वसाधारण सगळ्यांच्या घरी एक शीतकपाट / फ्रिज असतो. कारण एक फ्रिज पुरेसा असतो. पण ह्या पठ्या कडे एक फ्रिज जो होता तोच इतका भलामोठा होता कि ज्याचं नाव ते आणि तस्साच दुसरा पण त्याहून मोठा दिसला. दाही बोटं तोंडात घालून मी जेव्हा विचारलं कि का दोन दोन एका घरात तर म्हणे एक नेहेमीच्या वस्तू ठेवण्यासाठी आणि दुसरा मुख्यतः फक्त आईसक्रिम आणि थंड पेयांचा साठा ठेवण्यासाठी. देवा. काय काय करतील लोक सांगताच येत नाही. एकावेळी एका घरात इतके लिटर आईसक्रीम आणि ते पण इतक्या प्रकारचे म्हणजे माझ्या बघण्यात नव्हतंच कधीही. अर्थात दिल्ली कडे खाण्यापिण्याचं जरा प्रस्थ जास्तच आहे, दिखावा पण. असो. मला नवीन काही तरी शिकायला आणि बघायला मिळालं आणि असं हि असत हे समजलं.
कोणत्याही टिप्पण्या नाहीत:
टिप्पणी पोस्ट करा