धंदा ह्या विषयाचं माझं ज्ञान अगाध आहे आणि अगदी तोडकं. तरीदेखील माझ्या चार डोळ्यांना जे दिसतं, जे दररोज / नेहेमी टिपलं जातं ते आज मांडण्याचा प्रयत्न करत आहे. माझ्या कचेरीला घरून पोचण्याकरता साधारण २० मिनिटे लागतात. त्या संपूर्ण रस्ताभर मला लहान मुलासारखं ह्या-त्या बाजूला बघणे फार म्हणजे फारच भावतं. ती दररोजची एक पर्वणीच असते. जेव्हा मी गाडी चालवते किंवा बाजूला बसते तेव्हा देखील नवीन काय झालयं हे बघायला फारच आवडतं मला, मनापासून. फक्त माझ्या कचेरीच्याच रस्त्यावर नाही तर इतरत्र सर्वत्र मला सध्या केक चा धंदा बुलेट ट्रेन च्या गतीने फोफावतांना आढळतोय. बरं मी असं ऐकलं होतं बिझनेस च्या गुरूंकडून कि नवीन दुकान थाटण्याआधी एक आढावा घेतला जातो, कि तो धंदा चालेल का, बहरेल का सुरु केला तर? पण सध्याचं दृश्य फारच निराळं आहे. एका बाजूला एक खेटून त्याच धाटणीतली दुकानं दिसतात. ती कशी चालतात देव जाणे. पण चालत असतील असा अंदाज आहे. केक ची दुकानं बघून मला हि निश्चित खात्री पटली कि सर्वत्र सण आणि असंख्य वैविध्य उपक्रम साजरे केले जात आहेत आणि केक हा सर्वांच्या आवडीचा झालेला आहे, किंबहुना प्रत्येक प्रसंगी केकचं स्थान अग्रणी आहे कि काय असं वाटायला लागलं आहे. इतक्या मोठ्या प्रमाणात जर केक फस्त केला जातोय सर्वांकडून म्हणजे कित्ती गोडवा पसरतोय बघा नं? अहाहा च.
मी भल्या मोठ्या विविध दिग्गजांकडून असं ऐकलं आहे कि तुम्ही जे खाता तसे तुम्ही असता, थोडक्यात.
सध्या लग्न, मुंज, वाढदिवस, नवीन दिवस, नोकरी, बक्षीस समारंभ, कुठलीही गोड बातमी, बढती, नवीन गाडी, घर, स्पर्धा, किंवा इतर अनेक प्रसंगी केक खाऊन तोंड गोड सतत केल्यामुळे मग जिभेवर प्रचंड गोडवा पेरला जाणारच, मन पण विविध प्रकारचे केक खाऊन अगदी तृप्त, संतुष्ट, म्हणजे विचारूच नका. फक्त दुकानं नाही तर घराघरात, गल्ली बोळात, केक तय्यार करून मिळतो किंवा केला जातो. तरीच म्हणते हवेत गारव्याशिवाय गोडवा का इतका पसरला आहे? आणि जाणवतो आहे?. आत्ता समजलं / उमगलं. चालू द्या, भरपूर केक खा, आणि गोडवा पसरत राहा.
कोणत्याही टिप्पण्या नाहीत:
टिप्पणी पोस्ट करा