मी अगदी शालेय दिवसांपासून हेच ऐकत आले आहे कि "स्वभावाला अजिबातच औषध नसतं". माणसाचा स्वभाव कधीच बदलत नाही. काहीही झालं तरी इंचभर बदल घडत नाही तो म्हणजे स्वभाव. हे मी काही धड्यात वाचलं, शिक्षकांच्या तोंडून ऐकलं, वर्तमान पत्रात, गोष्टी, कथा ई. मार्फत विविध वेळा हे माझ्या कानावर पडलं. कदाचित त्यामुळे बिंबलं गेलं. मोठी होत असतांना अनेक वेळा मला वेगवेगळे अनुभव आले. त्यातलाच एक इथे कथन करत आहे. माझे एक सहपाठी होते, माझ्याच कार्यालयात काम करत होते, पण मानव संसाधन विभागात. कधीही म्हणजे कधीही सरळ उत्तर मिळालेच नाही त्यांच्याकडून किंवा नेहेमीच स्वारी नकारात्मक बोलण्यावर जास्त भर द्यायची, अगदी मनसोक्त. मी ते स्वीकारलं होतं त्यामुळे मला जास्त कठीण, अवघड किंवा अवजड नाही गेलं आणि अर्थात माझा त्यांचा तसा कधीतरी संबंध यायचा. एक जगावेगळा चमत्कार मी काही दिवसांपूर्वी अनुभवाला. मला भलामोठा धक्का बसला, झटका लागला आणि आश्चर्य देखील वाटलं. मला माझ्या कानांवर अजिबात विश्वास नाही बसला पण मग असे अजून दोन एक प्रसंग झाले रांगेत त्यामुळे मग निश्चित झालं कि "स्वभावालाच औषध असतं". अगदी सहज नाही पण स्वभाव संपूर्ण बदलू शकतो. माझ्या काही प्रश्नांना इतकी व्यवस्थित उत्तरं मिळाली, काळजी जाणवली त्यांच्या शब्दात, बोलण्यात, लिखाणात आणि वागणुकीत देखील. इतका मोठा जमीन अस्मानाचा फरक म्हणजे चमत्कारचं. खूप खूप प्रसन्न वाटलं, खात्री पटली कि त्यांना जाणीव झाली, उमगलं महत्व माणसाने माणसाशी माणसाप्रमाणे वागणं कित्ती गरजेचं आहे ते. माणुसकीने वागण्यामुळे, स्वभावात ठरवून बदल घडवून आणण्यामुळे स्वतःला तर प्रचंड समाधान मिळतं, माणसं जोडली जातात, नाती टिकतात, खूप सुंदर संबंध दृढ होतात, समाधान मिळते आणि सर्वत्र सकारात्मक वातावरण निर्मिती होते. हा बदल घडला कशा मुळे हे मला माहित नाही आणि जाणून घायचे नाही. असतील काही कारणं, जाणीव झाली असेल, घटना घडली असेल, काहीही असलं तरी शेवट गोड झाला आणि नवी सुरवात गोड झाली हे अत्यंत महत्वाचं. अशीच सर्वांना सद्बुद्धी होवो हि ईशचरणी प्रार्थना म्हणजे सगळेच आनंदाने एकमेकांसोबत गुण्यागोविंदाने काम करतील, खूप उत्कृष्ट कामे साधली जातील आणि "आनंदी आनंद गडे जिकडे तिकडे चोहीकडे" अशी वातावरण निर्मिती देखील होईल सातत्याने.
कोणत्याही टिप्पण्या नाहीत:
टिप्पणी पोस्ट करा