भारतात, पुण्यात किंवा इतर शहरांमधे साधारण १५ एक वर्षांपूर्वी बांधलेली घरं म्हणजे फ्लॅट. महानगरात फ्लॅट हा थोडासा परवडणारा उपाय आहे. फ्लॅट म्हटला कि एखादी बाल्कनी आलीच. बाल्कनी म्हणजे मोकळी / उघडी जागा, जागेच्या सभोवताली असलेला कठडा, त्यावर बार्स / ग्रिल ई. तो कठडा कदाचित ह्या करता बांधतात कि एक तर त्या ग्रिल / बार्स ना एक आधार शिवाय एक सीमा किंवा कुंपण असल्यासारखे, एक आधार किंवा एक सभोवतालचं बांधकाम ई. त्या कठड्याला एक रुंदी, उंची आणि जाडी असते. त्यावर / त्याच्या आधारे बार्स बांधलेले असल्यामुळे कठडा असून सुद्धा त्यावर बसता येत नाही. मध्यमवर्गीय लोकांना सहसा घर म्हटलं कि हिरवळ आणि चार झाडं, त्यामुळे बाल्कनीत कुंड्या ठेवायची सवय आहेच. छोट्या, चपट्या, आयताकृती अश्या कुंड्या मावतील देखील ह्या अश्या कठड्यावर पण बाल्कनी हि घराबाहेर चा भाग असल्यामुळे बऱ्याचश्या सोसायटीत कुंड्या कठड्यावर मांडण्याची परवानगी नाहीच. मग तसं बघितलं गेलं तर त्या कठड्याच्या सपाट भागाचा खरं काही उपयोग नाहीच. पण सपाट भाग असल्यामुळे त्यावर धूळ प्रचंड साठते, घाण होते, पालापाचोळा ई. पडतो आणि शिवाय ती साफ करतेवेळी प्रचंड काळजी घ्यावी लागते. नाही तर खालून जाणाऱ्यांची दुसऱ्यांदा आंघोळ व्हायची. हे सगळं अनेक वर्ष बघून आज सहज एक डोक्यात आयडियाची कल्पना आली. सपाट भागाशिवाय जर तिरकस किंवा आतल्या भागात उतार असलेला असं बांधला तर? खूप घाण साठणार नाही आणि धुतांना / पुसताना अगदी सोप्पे होईल, खाली जाणाऱ्यांची आंघोळ होणार नाही आणि सगळं पाणी बालकोनीतच पडेल? कित्ती सहज सोप्पं आहे ना? मग का करत नाहीत हे बांधकाम व्यवसायी?
किंवा आधी कठडा देऊन मग नियम करण्यापेक्षा नाही दिला इतका मोठा कठडा, आडवा देण्यापेक्षा उभा दिला तर जास्त सोयीचं होईल माझ्या दृष्टीने.
गरज किंवा उपयुक्तता हिचं नाविन्यपूर्ण गोष्टी करण्याची पहिली पायरी आहे. वापरायला लागलं कि मग त्या वस्तूचे फायदे आणि तोटे दिसायला लागतात, नवीन पद्धती सुचवता येतात आणि अश्या पद्धतीनेच एक व्यक्ती / एक व्यवसाय / एक जागा / एक देश पुढे जातो, प्रगती करतो. वास्तुतज्ञांना माझ्या चार डोळ्यांनी टिपलेले असे हे छोटेसे निरीक्षण आवडेल आणि ते ह्यावर नक्की विचार करतील हि अपेक्षा.
कोणत्याही टिप्पण्या नाहीत:
टिप्पणी पोस्ट करा